政情：民主阿婆露底死攬曾財爺

「民主阿婆」陳方安生沉寂咗一輪，尋日計啱時間，又出嚟作政治抽水，有如抽水機器。佢跟風狠批預算案，話直接向市民派六千蚊，係偏離審慎理財原則，一錯再錯，轉軚派錢更加嚴重影響政府嘅管治權威喎。

民主阿婆鬧預算案，表現出一副大義凜然、為民發聲嘅樣子，但當記者問到，制訂呢份預算案嘅「鬍鬚曾」曾俊華係咪應該引咎辭職，佢即刻露底，龜縮唔肯表態，反而將預算案與民為敵，歸咎於香港缺乏民主制度，官官相衞本色表露無遺。尋日上街怒吼要求鬍鬚曾執包袱走人嘅逾萬名市民，如果知道民主阿婆咁錫住舊同袍，一定好失望。

同屬前高官，平等機會委員會主席林煥光評論預算案就比較中肯，佢叫鬍鬚曾唔好沉迷政治化妝。佢透露，平機會收到十幾宗新移民投訴，批評只有香港永久性居民先至有得收六千蚊，涉嫌觸犯歧視條例，不過，林坦言，喺法律層面難以跟進，惟有等派錢方案出台，從公平資源分配原則上再作研究。