政情：蔡菜子遊中東等運到
立法會前議員蔡素玉上月去完廣西自駕遊後，又計劃喺四月底前往中東約旦、敍利亞及黎巴嫩旅行。不過，突尼斯「茉莉花革命」引發嘅「中東波」仲如火如荼，約旦及敍利亞兩國更被港府發出黃色外遊警示，黎巴嫩更被列為紅色外遊警示，蔡菜子呢個中東之旅真係凍過水。
不過，蔡菜子已經支付咗過萬元團費，現時正密切留意當地局勢發展，但佢好樂觀期望中東局勢喺四月底前平定下來。講番蔡菜子嘅中東之旅，原來係同埋六十名港大校友一齊去，包括港大專業進修學院院長李焯芬，睇陣容同聲勢就知呢個團似去考察古蹟多過遊埠歎世界，梗係啦，淨係約旦佩特拉古城（Petra）嘅古羅馬商旅歷史都有排講喇。
蔡素玉好鍾意去旅行，圖為佢遊西藏時留影。 （資料圖片）