政情：鬧爆最廢預算案 廠商會自己打虎

財爺鬍鬚曾喺上禮拜三發表嗰份被嘲為「史上最廢」嘅預算案後，劣評如潮，近呢幾日先後畀多位商界人士鬧爆。

中華廠商會尋日搞慶功宴，賀早前舉辦嘅工展會丁財兩旺，入場人次同銷售額都係歷屆之冠。會長黃友嘉都忍唔住鬧埋一份，批評預算案冇幫到中小企，試諗吓，街邊一個舖位做小生意都係中小企嚟，面對租金不斷加，店主真係好難捱，但預算案冇提到畀中小企有稅務優惠，改善佢哋嘅營商環境。

又難怪黃友嘉咁講嘅，鬍鬚曾顧此失彼，早前幾次出招遏樓價、趕炒家，最終咪又係虛招，效果得嗰個幾月貨仔，樓價又升番，住宅都理唔掂，又點得閒理商舖租金吖！就算係市民最切身面對嘅通脹狂飆問題，佢嗰份預算案竟然以唔想刺激通脹為由，唔肯退稅，只係話將六千蚊注資入強積金戶口，又話建議推出同通脹掛鈎嘅債券，中產、基層同「Ｎ無」人士都冇受惠。

食品嘉年華

鬍鬚曾根本係搵藉口唔派錢，繼續做守財奴，依家通脹猛於虎，求人不如求己，惟有自救，廠商實行打虎，嚟緊四月二十一號至五月二號，喺旺角花墟公園舉行第二屆香港食品嘉年華嚟抗通脹。

點抗通脹法？廠商會副會長兼展覽服務有限公司主席施榮懷話，佢哋今次以優惠價租金優待檔主，雙方傾好條件，食品價錢要優惠，回饋市民，所有美食會以約市價八折出售，幫大家抗通脹。中小企可以散貨，市民又可以買平嘢，可謂一家便宜兩家着！