日前香港癌症基金會嘅周年慈善餐舞會搞新意，Party以十八世紀印度宮殿為背景，城中名人穿金戴銀變身印度西施同印度王子開P，原來立法會議員陳健波一度好頭痕。
陳健波拖埋太太嚟湊熱鬧，但佢着西裝、打領呔，拍埋嘉賓身邊，似乎單調咗啲。冇法啦，佢同太太翻轉衣櫃都摷唔到印度衫，一於以不變應萬變，着飲衫最穩陣。
名媛榮文蔚老公阮偉文去慣Ball，信手拈來一頂插滿羽毛、鑲滿寶石嘅王子帽，維肖維妙，但頂帽有成五、六磅重，戴咗陣膊頭都「冤」埋。
陳健波（中）衣櫃冇印度衫，惟有同太太（右）以飲衫去Party，左為滙豐保險總監及工商保險主管蔡香君。
阮偉文（右）扮印度王子，同癌症基金會創辦人及總幹事羅莎莉撐場。
