政情：葉劉落區摷苦主插預算案

    • 外界狂轟新一份預算案係垃圾，新民黨正、副主席葉劉淑儀同田北辰前日一等鬍鬚曾喺立法會讀完份預算案，即刻落區搜刮「人辦」個案，睇吓邊啲階層插得預算案最勁。

    新民黨嘅facebook尋日下晝貼咗一輯相，相中嘅葉劉手執預算案，喺街邊同街坊雞啄唔斷。問葉劉所為何事？原來佢哋拎住鬍鬚曾呢本「罪證」，四圍去搵苦主，聽吓街坊點樣勁插預算案。葉劉引述相中嘅灣仔茶餐廳老闆娘稱，預算案完全幫唔到街坊手，通脹嚴重，食材價格飆升，以生粉為例，由每包一百幾蚊加到三百幾蚊，舖租又狂升，營運壓力百上加斤，但係預算案對佢哋嘅困境視若無睹，只係識向綜援戶出雙糧等小恩小惠措施，令人失望。

    老闆娘同葉劉傾到七情上面，睇嚟對預算案好火滾，葉劉搵到呢個「人辦」個案，嚟緊要插鬍鬚曾都理直氣壯啲。

    Money18 新功能「18好路數」為你預測心水股票升跌機會率

    葉劉（左）落區收料，儲足彈藥評預算案。