政情：阮蘇少湄春茗風采依然
前年自爆患早期乳癌嘅「中電一姐」Betty阮蘇少湄，請咗半年病假休養，舊年二月復出後低調咗好多，原來佢轉戰幕後，喺前線衝鋒陷陣嘅工作就交畀接任嘅中電常務董事藍凌志負責。
Betty過去一年少咗公開曝光，但抽多咗時間出席社交界活動，好似上禮拜就見佢現身香港友好協進會新春午宴，尋日中電高層搞春茗，當然唔少得佢啦，只見佢風采依然，佢話依家健康情況好好。
佢對中電嘅工作當然一樣着緊，轉任中電香港副主席之後，佢專責香港及華南業務嘅策略發展，好似西氣東輸、建設天然液化氣站同核電業務發展等大Project咁，都係佢一手包辦。另外，中電聽日公布業績，佢都會親自出嚟主持大局。
