政情：湯恩佳豪宅升值70倍
六大宗教領袖日前舉行新春團拜，祝願世界和平，唔好有天災橫禍，孔教學院院長湯恩佳更希望兔年經濟暢旺，市民安居樂業。湯恩佳向來將儒家思想融入商道，本身更生財有道，佢話世界經濟環境變化好大，最穩健就係買物業收租，估計樓市會有兩成升幅，但同時希望政府加強協助有需要嘅市民置業。
湯恩佳透露佢喺港九新界都有住宅同舖位收租，全部係幾十年嚟買落，至今已升值十倍計，好似位於石澳嘅大宅，八八年買入價一千三百幾萬元，估計至今已升至逾十億元，升幅達七十幾倍。有傳聞話湯恩佳身家高達二百億元，佢笑稱：「冇咁多，幾十億啫！」佢希望喺兔年搵多啲錢，捐多啲錢幫助有需要嘅人。
孔教學院院長湯恩佳