政情：黃成智減肥執麥皮填肚
唔少人過完年都話自己肥咗，白鴿黨立法會議員黃成智更自爆腰圍日粗，好多指標已達臨界點，好似血糖同膽固醇咁，所以兔年伊始已經畀老婆大人迫令減肥，依家每日都食得好清淡。
佢仲透露自己嘅節食生涯，譬如一盒朱古力食一半就會畀人拎走；飲咖啡要用代糖；每朝早餐只可以食麥皮加乾果，近日老婆連乾果都唔畀佢食，每朝只可以食麥皮。早排有班環保團體拎住一啲用麥皮罐做嘅道具示威，黃成智話自己後來發覺裏面仲有麥皮，為咗唔想浪費，全部拎返晒屋企，依家啱晒喇，呢啲示威剩餘物資落晒佢肚。
阿智仲話，佢嘅腰圍比黨主席何俊仁仲要粗，只係對方喺比例上睇落較肥，佢咁講，真係有明寸鐵頭仁矮之嫌噃。
新年伊始，黃成智自爆畀老婆大人勒令減肥。