政情：搞搞政：范國威撲水打選戰

啱啱過去嘅虎年可以話係政黨分裂年，入咗兔年，啲新團體就忙住省招牌，事關今年底就有區議會選舉，啲大小政團都要忙住打選戰。不過，三軍未動，糧草先行，冇水又點打選戰呢﹖難怪啱啱由白鴿黨分裂出嚟嘅新民主同盟尋日都話，要立即開始連串籌款活動，組織輪任召集人兼西貢區議員范國威（Gary）首次當家就面對耕旱田嘅滋味，真係要快啲諗計至得！

Gary尋日同新民主同盟一班兄弟出嚟同傳媒聚會，佢哋既要打響名堂，又要度水籌款，已經計劃多個行動，包括食住由佢設計嘅「普選鳳凰」概念，再設計一系列普選紀念品，喺七一遊行前再次吸水；又計劃喺社交網站facebook搞籌款活動，目標係過埋區選可以有錢剩租番個會址。

Gary仲睇中潮物iPhone嘅用家，打算創先河設計個專屬應用程式嚟籌錢。佢話依家唔少人對網上捐錢仍然有保留，但用開iPhone嘅人就冇呢個心理障礙。呢個概念雖然唔錯，不過唔少iPhone用家一直淨係用免費程式，如果靠佢嚟選舉，唔知幾耐先籌夠錢呢？