政情：鐵頭仁忽然青春爆瘡
兔年伊始，立法會尋日就演習走火警，議員都要扮吓走難，人頭湧湧中，白鴿黨主席何俊仁卻一副傷兵咁嘅樣，鼻樑左邊貼咗一塊大膠布，仲要貼到歪歪斜斜，唔通演習加插救傷環節？
鐵頭仁擰擰頭，話自己個鼻生青春痘，即係暗瘡，仲自嘲可能農曆年寫揮春時寫得「青春常駐」多，忽然自己都好「青春」，可惜幾十歲人生青春痘，疏於護理，佢引述醫生指，粒瘡被污糟嘢入侵，變皮膚發炎，要食消炎藥，但兩日過去，粒瘡依然咁「青春」，未見凋謝，仲要打針同轉食另一種藥，結果畀黨友甘乃威笑佢嘅痘變咗「花開富貴」，夠晒攞景！
