政情：李家傑探貧童父愛爆燈
恒基地產副主席李家傑舊年一索得三男後，好少公開露面，最近佢喺新一期「新家園」季刊中大談幫助內地貧童嘅感受，字裏行間好錫小朋友，仲登咗一幀家傑探訪受惠「愛佑童心」內地貧童嘅照片，家傑哄塊面畀BB仔錫，一臉幸福滿足，好有慈父相。
家傑半年前與世茂集團主席許榮茂牽頭，與一班內房股老闆，籌募一億組成「新家園」協會，專門協助香港新移民。喺佢哋新一期季刊中，家傑以監事會主席身份接受專訪。
家傑一向鍾意細路仔，佢喺訪問中透露，佢嘅慈善工作有三個重點，其中一樣就係關注內地嘅貧病兒童。所以李家傑早前成立咗個「愛佑童心」專項基金，資助西北地區貧困家庭先天性心臟病兒童嘅手術費用。
