政情：郭少明感謝太太旺夫

打入福布斯香港富豪榜嘅莎莎國際主席郭少明，好謙虛咁話只係盡力做到最好。對於今日嘅成功，佢將功勞歸太太，話當年都係幫太太手先學到做化妝品生意。佢仲話太太好旺佢，三十幾年嚟，兩夫妻拍檔打江山，太太帶畀佢唔少好運。

佢哋都鍾意趁出門時買衫換季，事關每年都要去歐洲出席美容展，好似啱啱嘅禮拜日佢着住入馬場嗰件紫色Moschino西裝褸，就係喺歐洲買嘅，佢鍾情呢個牌子剪裁夠貼身。

打入富豪榜嘅郭少明話多得太太帶旺佢。