政情：搵東宮西宮擋箭 劉吳惠蘭面懵

香港被揶揄為文化沙漠，唔少本地薑創作人都曾開腔批評政府對佢哋諸多掣肘，扼殺佢哋嘅生存空間。立法會資訊科技及廣播事務委員會尋日召開會議，要求政府交代「創意香港」辦公室嘅工作進度，負責嚟解畫嘅商務及經濟發展局局長Rita劉吳惠蘭仲畀議員圍攻添！

其中有泛民議員直指現時本港創作禁區太多，董建華又曾批評港台節目《頭條新聞》屬低級趣味，令本港創作人唔敢開拍題材敏感或具政治元素嘅電影。

但Rita一於少理，反駁指政府冇喺創意文化方面設禁區，仲擺出「進念二十面體」同胡恩威每年都製作嘅政治嘲諷劇《東宮西宮》上枱嚟做擋箭牌，直言該劇充滿政治諷刺味道，可見本港「創作空間無限」喎。

模糊惠蘭出trip多過留港

眾所周知，《東宮西宮》係諷刺本港政治窘局嘅舞台劇，至今已經去到第九個系列，入座人數逾七萬人，就連陳淑莊未做立法會議員之前都曾經粉墨登場客串過。

上年搬上舞台嘅系列九更以「十大九官」為名，開宗明義寸盡三司十二局局長同一眾冇人識嘅副局政助。身為問責局長嘅Rita當然不能幸免，佢被力批年中出trip多過留港，港人對佢印象唔深，仲被譏為「模糊惠蘭」。套劇仲大玩官場「潛行凶間」，嘲諷政府官員同政策添！

睇嚟Rita擺呢套舞台劇上枱，係想話畀市民聽政府有幾開明，畀人鬧都冇做任何阻撓。之不過，若果政府高官同政策做得好嘅話，又點會畀人攞出嚟嘲笑吖，好明顯係政府做得唔好，所以要周街唱囉！Rita唔覺面懵之餘仲好意思借人過橋，今勻真係搬石頭揼自己隻腳囉！