政情：搞搞政：敬重華叔風骨 珠姐早釋恩怨

支聯會主席司徒華日前離開塵世，各界人士都對佢一生有好多評價，就連同佢政見唔同嘅建制派及傳統左派都給予唔少肯定及讚譽。尋日港區人大代表譚惠珠出席《中國點點點》節目時，直言華叔係一個佢敬重嘅政治領袖，佢哋兩人上世紀八十年代曾經交過手，但珠姐話冇將二人過去嘅「恩怨」放喺心上。又係㗎，政見唔同啫，寄一縷哀思以誌過去嘅歲月都好應該。

珠姐同華叔過去分別喺基本法起草委員會同立法局交過手，雖然大家政見不同，但佢尋日大讚對方係一個有文學修養、堅持原則嘅人。講到舊年政改一役，珠姐更盛讚華叔帶領白鴿黨唔參與公投，促使該黨同中央對話，係「一招拆三式」、有智慧嘅策略。

記得○二年華叔曾撰文質疑昔日受英國重視嘅珠姐變得親中，珠姐尋日反駁話，將一個人某段人生睇成佢嘅立場並唔應該，反駁自己早喺回歸前已放棄居英權同英國公民身份，不過自己並冇將件事放喺心上：「我當時唔評論，依家都唔評論，呢啲事何足掛齒呢？」