政情：應家柏揭馬場路牌陷阱

喺馬會做咗十幾年嘅馬會行政總裁Winfried應家柏，期間解決過唔少難題，但有個難題困擾佢好耐都未解決。佢話大埔公路沙田段向大埔及粉嶺方向嘅一個「馬場」路牌指示唔清晰，令唔熟路嘅駕駛人士被迫違例由中線切入慢線，再駛上通往沙田馬場嘅天橋，結果險象環生，有次佢仲幾乎收唔切掣撞向突然由中線違例切入慢線嘅車輛。

Winfried過去先後向警務處同路政署投訴上述路牌唔清晰，但兩個部門都話唔關佢哋事，原來係佢搵錯部門，有關路牌投訴應該搵運輸署至啱。不過，警方收到投訴都冇幫手向運輸署反映，而且每逢賽馬日都派出多名交通警員到通往馬場嘅行車天橋守候，向違例切線嘅車輛抄牌，擺明無意改善上述路牌唔清晰嘅情況，令駕駛人士誤墮陷阱。

身兼馬會會員嘅沙田區議會副主席彭長緯話，佢經常會使用有關路段入馬場，認同路牌指示確有唔清晰，唔熟路嘅駕駛人士當見到路牌指示時已經冇得切入慢線，佢話會去信運輸署反映有關情況。