政情：唐唐勁輕佻激嬲葉劉

仲記得政務司司長唐唐喺兩年前出席立法會會議時，形容因漢普頓酒店被查封而流落街頭嘅遊客係「條條fing」，依家仲畀人鬧緊佢輕佻，但佢死性不改，尋日喺立法會內會特別會議上又亂咁辣班泛民議員。

話說唐唐講人口政策，民協馮檢基批評港人同國內嘅人結婚，如果老婆係香港人，生仔可以畀津貼價，但一旦老公係香港人，老婆生仔就要畀成本價三萬九千蚊，等同歧視男人，要求一視同仁。點知唐唐死口唔認之餘，仲話：「我哋唔歧視男人，如果阿基你識生仔都可以收平價！」完全夾硬嚟！跟住有公文袋議員炮轟當局懶理空氣質素，搞到唔少人移民為求一口新鮮空氣，點知唐唐唔受批之餘，仲笑笑口咁話對方生得高，先睇唔到空氣污染有所改善嘅數據喎！

眼見唐唐視議員意見如無物，曾同佢有同袍之義嘅葉劉都頂唔順，會後力斥聽唐唐「喺度廢噏」、「嘥人時間」，又質疑佢做咗官咁耐，講嘢都係零進步，係同佢半途出家有關。葉劉話諗唔明唐唐咁嘅態度點解仲要嚟開會：「佢可能想窒人，又或者想表現幽默感，但工夫完全唔到家！」寸人者人亦寸之，葉劉呢巴都算摑得應咯！