政情：北區白鴿仔通宵靜坐裝假狗？

明年就係區議會換屆選舉，各大政黨已經磨拳擦掌，準備埋身肉搏。好似白鴿黨同建仔咁，兩個黨嘅北區區議員前幾日不約而同喺港鐵粉嶺站附近搞咗個靜坐行動，抗議北區公共交通服務欠佳，建仔除咗靜坐之外仲玩埋絕食，為爭選票確係無所不用其極。

潘忠賢：畀仇家屈

我哋收到有心人報料，話白鴿黨嘅區議員喺靜坐期間其實冇玩足全程，凌晨時分趁人流疏落，成班一齊閃咗；有心人仲連續兩晚影低現場情況，似乎同白鴿黨都幾大仇口。尋日搵到其中一名參加行動嘅白鴿黨區議員潘忠賢回應，佢即時大吐苦水，話自己係畀人屈嘅。

佢話靜坐嗰兩晚都肯定有人喺度，除咗去洗手間外冇離開過半步，佢仲話YouTube上面已經有段片，但就專登唔影佢哋嘅帳篷同瞓緊覺嘅人。仔細睇番有心人畀嘅相，又好似隱隱約約見到白鴿黨嗰邊講嘅破綻，至於實情係點？看官自行判斷嘞！