政情：鐵頭仁急訂中山裝去挪威
乜嘢事咁趕呢？原來佢雖早知要去挪威見證冇得獎人出席嘅諾貝爾和平獎頒獎典禮，喺大會規定嘅踢死兔同民族服裝之間，佢選擇着中山裝，始終係中國人嘛。而且擁有一件中山裝一直係佢嘅願望，今次終於可以的起心肝買番件。
上周五，鐵頭仁去咗旺角搵間平靚正嘅店舖執番件，點知去到先知間舖執咗笠。鐵頭仁惟有就近行過上海街間觀奇洋服，拿拿臨落急單訂造。鐵頭仁套中山裝嘅設計，基本上保留咗傳統原汁原味嘅四個袋特色，唯一係捨棄反領要番企領，佢仲話反領好難着喎！
鐵頭仁終於擁有人生首件中山裝。