SUN世代：少年股神搵工講興趣

大學時期已贏得「少年股神」稱號的何啟聰，投身金融界僅七年，身價已幾何級數跳升，能夠極速上位，與他一早立定志向有關。他以過來人身份勸勉大學生：「搵工應以興趣行先，有興趣自然會做得好！」

二十九歲的何啟聰（Ivan）出道短短七年，已名成利就，今年初從荷蘭銀行跳槽至瑞士信貸，出任香港認股證及牛熊證銷售主管，年薪達七位數字。他的成功，或許能夠讓一眾80後借鏡。

母打本10萬炒藍籌

父親是刀莊打鐵師傅，母親在街市工作，Ivan出身基層家庭，中學讀英華書院，○三年科技大學財務系畢業。早在中三，他已對股票產生濃厚興趣：「當時有同學發起模擬投資比賽，我覺得幾得意，於是開始睇財經新聞，留意股市走勢，原來肯花時間研究，結果某程度可以由自己控制，好有成功感！」

母親見他分析股市有紋有路，遂打本十萬元給他，他就從藍籌股入手，大有斬獲；十八歲自己開戶，用暑期工賺來的兩、三萬元炒股，一度「賺double」。及至大學一年級，參加商台及新城舉辦的少年股神及青年領袖計劃，兩個比賽都打入決賽，贏得「少年股神」稱號。

「我對金融業真係好有興趣，一早已立定決心入行。」可惜大學畢業撞正沙士，經濟跌落谷底：「好多同學都入咗會計師行，諗住可以避一避，而且人工有成萬蚊，當時已經算好好。但我知道自己興趣喺邊，即使人工低，都要入咗行先。」

首份工月薪僅$6500

他第一份工是在致富證券任操盤員，人工只得六千五百元：「正因為係細公司，老闆好肯畀機會新人。」他初時專責籌辦投資講座，認識不少窩輪發行商，加上入行前已有豐富投資經驗，後來更有機會上陣講股。一年半後他被荷銀挖角，最初只擔任策略師，憑着出色表現，四年內連升四級成為董事。今年初再過檔瑞信，人工更以幾何級數倍增。

總結成功經驗，他認為及早立定志向很重要：「大學畢業後，搵工應以興趣行先，咁先會有推動力，唔好太計較一時嘅人工。做咗兩、三年，發覺唔啱就要即刻轉，否則拖到三十歲，人工已經有番咁上下，要從頭嚟過就會好困難。」

Ivan's Profile

年齡：29歲

學歷：香港科技大學財務系學士

現職：瑞信香港認股證及牛熊證銷售主管

興趣：財經金融、健身、旅行、看電影