政情：大輝表演「沖涼」掀高潮
政情：大輝表演「沖涼」掀高潮
政壇中人最好十八般武藝樣樣識啲，尋日由立法會廠商會代表林大輝牽頭嘅C18（社區十八）第一次落區搞活動，揀咗喺觀塘舉辦「社區身心健康日」，食物及衞生局副局長梁卓偉有份出席，仲同其他嘉賓一齊示範跳健康操，大輝事前好努力，見佢不時踢腳，好似熱身咁，點知，佢啲舞藝就真係唔敢恭維。
大輝同梁卓偉都跟住老師一齊跳健康操，呢個舞由頭到腳，式式唔同，大輝心情勁靚，跟足嚟做，不過佢啲招式就娛樂性有餘，跟佢跳就諗過先，好似其中一招捽面捽手嘅動作，簡直係高潮位，大輝嘅動作就好誇張，大會揀咗支數字歌同范曉萱嘅《健康歌》做背景音樂，但睇大輝嘅動作，好多人可能覺得似范曉萱另一首名作《我愛洗澡》多啲。
相比之下，梁副局就含蓄好多，佢有音樂底，跟節拍冇甩拖，跳起上來仲好斯文添。
大輝（左）捽面嗰陣，表情比梁卓偉（右）誇張得多。
大輝跳健康操，手舞足蹈過足癮。