政情：泡沫淹到埋眼 鬍鬚曾扮高人

美國日前推出第二輪量化寬鬆措施，熱錢再度氾濫，本港股市、樓市狂升，資產泡沫風險愈嚟愈高，但港府至今未見應變，財政司司長曾俊華尋日去日本京都出席亞太經合組織財長會議時，卻大言不慚話香港已經喺樓市落實咗啲措施，仲好似高人咁提醒其他國家要小心通脹，同保護主義升溫嘅風險。資金狂潮下，香港都自顧不暇，鬍鬚曾仲喺度扮高人，小心畀泡泡浴浸親，成為國際笑柄呀！

樓市虛招都攞威

鬍鬚曾喺財長會議上話，依家外圍環境存在變數，資金又氾濫，加上持續低息嘅環境超乎預期，亞洲區出現資產市場過度蓬勃嘅風險都上升咗，佢跟住將港府早前喺樓市推出嘅措施列作應付呢啲風險嘅措施，好似港府及早應變、仲預知風險咁。

不過，人哋唔知啫，香港人就個個知道政府早輪嗰啲冷卻樓市招數，其實係舊年以來，無業者不滿樓價一直飆升，再三要求政府出招先推出嘅，仲要政府連推幾次措施都冇用。點知轉過頭，鬍鬚曾竟然攞呢啲招數去國際會議上耀武揚威，真係唔怕醜。

叫外國小心通脹

佢跟住又懶醒咁話，亞洲地區各國推出嘅措施應該保持經濟基調良好，同時要警惕通脹上行，同埋保護主義升溫，好似先知指點人哋咁。水浸眼眉在即，鬍鬚曾都係嗰句，必要時政府有進一步穩定金融市場嘅措施。依家本港中下價樓已經追到九七年，恒指更每日幾百點上升，資產泡沫咁樣谷落去，香港真係好危險，好心鬍鬚曾踏實啲，早啲出招好過喇。