消防漏洞不堵塞 人間悲劇陸續來

旺角嘉禾大廈前年嗰場五級大火造成四死五十幾傷，搞到人心惶惶，談火色變。死因庭陪審團尋日一致裁定包括兩名消防員在內嘅四名死者全部死於意外。咁即係話，冇人要為佢哋嘅死負責。呢個結果其實係意料之中，不過，無論點判法，人死都不能復生嘞，家陣最緊要係堵塞漏洞，防止悲劇重演。

消防處表面上兵強馬壯，設備先進，其實係金玉其外，敗絮其中，大火一燒就現原形。神話中嘅高僧都有一塊照妖鏡，無論係化裝成美女嘅白骨精，定係扮成白眉道人嘅老妖，喺照妖鏡下都無所遁形。今次死因聆訊亦係一塊照妖鏡，將消防系統嘅弊端全部曝光。

例如死因庭話，消防隊目蕭永方同消防員陳兆龍喺火場救市民時被困喺天台，吸入濃煙致死。講得冇錯，問題係佢哋都戴咗煙帽，點解會吸入濃煙嘅？聽下檢查煙帽工具嘅消防員點講。原來佢哋兩個嘅煙帽、求生警報、氧氣樽開關掣同個人警報器都失效。即係話，佢哋當時叫天不應、叫地不靈，被監生焗死！

裝備有問題嘅唔止佢哋兩個，勞工處人員作供時踢爆，火警當日部分煙帽隊員上到嘉禾大廈七樓，氣樽裏面嘅氧氣已經唔夠用；部分進入火場嘅消防員又無法用無線電通訊器材聯絡指揮車。即係話，其他消防員亦分分鐘會死喺火場。家陣兩人殉職，已經算係不幸中之大幸咯。

咁嗰兩位市民又點解會死呢？原來出事卡拉OK夜總會啲窗都被密封，又冇灑水系統，火警通報系統又因為拖欠費用被截停。大廈內嘅防煙門有啲被鎖，有啲根本冇門，有起事嚟裏面嘅人唔一鑊熟都要燒香還神咯。政府成日都話要監管舊式大廈嘅娛樂場所，呢間夜總會居然無王管，你話怪唔怪？

講咗咁多，大家都會明白，呢幾位死者話就話死於意外，其實都係事出有因。如果消防處及時更新落後裝備，消防員就唔會戰死沙場；如果政府唔係對舊式大廈娛樂場所監管鬆懈，兩位市民就唔會命喪黃泉。

不過，大火唔燒都燒咗，事實冇可能改變，家陣最緊要係吸取教訓。呢，陪審團提出好多建議，要求消防處改善無線電通訊裝置，設立緊急通訊頻道，加強巡查樓宇結構及防火措施，以及加強公眾教育，呼籲業主定期維修樓宇等等。

消防處亦口口聲聲話要改善消防人員裝備，加強監管舊式大廈消防設施，可惜空口講白話。死因庭裁判官踢爆，出事後其他消防人員仲繼續用蕭永方同陳兆龍用過嘅煙帽工具，處方一早就話要更換消防員嘅通訊器材，但到依家仲未實現。當局咁搞法，直情係草菅人命，想悲劇唔重演都難咯！叮佢個鎯鎯！