政情：搞搞政：傻強唔交功課 財委冇會開

立法會已復會半個月，財務委員會亦計劃喺下月中開鑼。不過，向來出名多嘢審議同批核嘅財委會，復會後嘅首次會議竟然胎死腹中，原因係政府歎慢板，竟然連一份撥款報告申請都交唔出。

財委會原定於下月十九號開鑼，審理政府新一輪嘅撥款申請。雖然屆時立法會已經足足復咗會一個月，但政府竟然連一份撥款申請都交唔到，搞到大家冇會開。立法會有得放暑假啫，政府各部門好似冇假放㗎喎，佢哋咁樣蛇王法，似乎唔係好講得過去噃！

查實向來鍾意使陰招嘅政府，往往會喺立會開鑼後歎慢板，但就留番好多具爭議性嘅法案草案，喺休會前先急急遞交，等立會可以快手通過，高鐵撥款同最低工資立法就係最佳鐵證。

今次財委會重開就脫腳，究竟係負責統籌嘅財經事務及庫務局局長「傻強」陳家強存心玩嘢吖，抑或係各部門蛇王偷懶呢？不過無論如何，傻強都應該快啲責成各部門做嘢，免得班議員又要喺休會前捱通宵。