政情：騰雞美華縮骨自保

外界早前炮轟政府部門以「消息人士」形式放料嘅吹風會愈嚟愈濫，其中以邱騰華做局長嘅環境局係重災區，又批評濫用吹風損害公眾知情權，而邱騰華更被指上任三年以嚟，不論係膠袋收費或停車熄匙等重要嘅民生議題，都冇召開正式嘅記者會。

雖然畀人鬧爆，但政府部門意見接受，態度依舊，吹風會陸續有嚟，尋日新鮮熱辣又一個，就係由有「騰雞美華」之稱嘅民政事務總署署長陳甘美華，講業主立案法團買第三者保險嘅事宜。

准引述內容兼影相

過往政府搞嘅吹風會，事先講明記者只可引述消息人士，唔准影相，但騰雞美華呢個吹風會有啲唔同，記者既可以引述佢講乜嘢，亦准影相。若果大家以為佢哋係接受批評後而有所改進就諗錯晒嘞！事關雖然放鬆部分限制，仲好似懶公開咁，但竟然唔准錄音，總署亦冇解釋點解有呢個限制。究竟葫蘆入面賣乜嘢藥？

騰雞美華尋日喺修頓中心三十樓，即民政事務總署嘅大本營召開吹風會，佢帶住幾個保險界人士坐喺台上解釋，仲有副署長傍住，過程中同記者有問有答，冇乜敏感同爭議性話題，簡直就係一個記者會，但唔知點解仲叫做吹風會。

政府部門搞吹風會，根本係想透過傳媒向公眾就某啲政策試水溫，若果引起社會爭議嘅話，主事官員亦可以唔上身，甚至屈番轉頭話係傳錯話，縮骨到不得了。

議題範圍大牽連廣

老實講，業主立案法團購買第三者保險嘅事宜範圍好大，牽連甚廣，既然政府要透過傳媒向公眾解釋，倒不如就堂堂正正咁舉行記者會，咁先係面對群眾嘅做法，但騰雞美華只係學精咗一半，另一半就繼續封閉。

既然記者可以引述佢講嘅嘢，又有相為證，點解唔准錄音呢？唔通係幫自己買定保險，驚自己講錯嘢，最後可以死無對證而甩身？係咪騰雞到咁呀？