Sun世代：一團和氣孕育球星

由「和仔」到「和哥」，直至成為「李Sir」，甚至當選坪洲鄉事委員會街坊代表，半雙腳踩入政壇，李健和堪稱球壇經典。他三度榮膺香港足球先生；但港澳埠際賽火爆「省」球證一事，卻曾令人生蒙上污點。這位被譽為「香港最後一位的球星」，將昔日在球場上那團火，化為作育英才的熱血，希望為本土球壇培育一個、再多個耀眼新星。

「希望您畀三年時間我……」這番話是李健和十四歲時，游說父親讓他加入菱電的青年軍說的，三年後和哥兌現承諾，成為職業足球員。直至今年已是第二十九個年頭，成為本港幾乎無人不識的球星。

自從四十一歲「掛靴」後，和哥沒有退休歎世界，他成為教頭轉用另一身份貢獻球壇。除了為生活，更大原因是本地球壇一落千丈：「三十歲前已考教練牌，隨時預備退休，但我啲老細總係想我踢多過教，竟然踢到四十一，三十幾歲人仲拎多次足球先生，真係好唔正常，反映香港足球培訓不足，後浪不繼！」

太腍善教唔到班o靚仔

和哥帶着救亡球壇的熱心加入教頭行列。有教無類，這位星級球員堅持不一定要教星級球隊才顯身價。他教過多隊球隊，現時主力執教丙組球隊東方及青年軍，他願意傳授「武功」給有心人：「最重要肯學，有心踢。」

提到教波之道，也不乏火氣：「太腍善係教唔到班口靚仔㗎，嚴厲係必須！」他強調不是執教足球興趣班，而是講求紀律的足球。要教好的豈止是球技，對每位球員脾性與天分都瞭如指掌的和哥，更甘願做「社工」：「讀書麻麻、百厭，但有足球天分嗰啲，係我栽培Target，我希望佢哋唔好放棄自己。」

希望教得一班就一班

球員有成績，師傅有面子，但和哥總是不在乎虛榮。○九年東亞運香港隊破天荒奪金，功臣歐陽耀冲、葉鴻輝都受過和哥栽培，但他堅拒叨光，否認是背後大贏家：「我好希望可以教得一班就一班，多啲出色球員，咁香港球壇先有救。」

執教背後，這位昔日球星最愛依然是踢波：「做球員，只要我到球場就得，唔使理隊友嚟唔嚟，但依家球員唔積極、唔投入，我都會勞氣，又要諗今日教乜！」不過，有足球理想支撐着，勞氣都變動力吧！剛度過四十三歲生日的和哥，連生日願望也送給香港球壇：「香港太少球員，希望教好班青年軍，香港要多啲新血！」

李健和小檔案

年齡： 43歲

暱稱： 和仔、和哥、大泡和

家庭狀況： 已婚，一子一女

個人榮譽： 三屆足球先生（93年、94年、03年）

曾効力球會：

東方（85-88）

麗新花花（88-89）

麗新（89-91）

東方（91-95）

南華（95-03）

晨曦（03-07）

華家堡（07-08）

東方（08-09）