政情：田二少扮老虎黐細路
政情：田二少扮老虎黐細路
富貴黨前主席田北俊新抱再次懷孕，呢個已係田少第四個孫，令胞弟田北辰恨到流晒口水。田二少恨抱孫，富貴黨高層人人都知，雖然佢有一子三女，但全未成婚，抱孫日遙遙無期。
田二少未有機會享受湊孫樂，可能愈缺乏，心靈愈渴求，平日一見到幾歲大嘅細路仔，就好似螞蟻「嬲」蜜糖咁。好似前晚萬聖節咁，富貴黨喺新界西搞居民慶祝活動，身為中常委嘅田二少去撐場，知道有大棚小朋友在場扮鬼扮馬，認為機不可失，六十歲嘅佢帶住個老虎頭套扮野獸，成晚黐住班細路，攬頭攬髻，雖然係人哋個孫，一樣玩到忘晒形，唔記得班細路嘅家長先至係有資格投票嘅選民，田二少有幾恨抱孫可想而知！
田二少扮細路同小朋友玩埋一堆，恨抱孫恨到出晒面。 田北辰提供圖片