政府懶理陰宅缺 先人何日置安心

好多人都話，港府不嬲都靠口號治港，一啲都冇講錯，十幾年嚟政府提出不知幾多高大空口號，但講得出做唔到，反而添煩添亂。例如，老懵董時代提出每年興建八萬五千個住宅單位嘅大計，就係活生生嘅畸士。

勢估唔到，最近政府又提出「陰宅八萬五」，話要十八區都起公營骨灰龕場，同時又鼓勵興建私營骨灰龕場。假若計劃成功，骨灰龕場成行成市，梗有一間喺左近。港人過身後都可以原區安置，「生係嗰區嘅人，死係嗰區嘅鬼」，又方便親人拜祭，咁咪幾好。

可惜政府淨係識得嗌口號，根本冇全盤規劃，搞到七國咁亂，公營骨灰龕場十畫未有一撇，違規骨灰龕場就遍地開花，孝子賢孫受騙上當，怨聲載道。

嗱，城規會就位於葵涌業成街嘅首宗改建骨灰龕場申請收到二十七份意見書，份份都反對改建。事關附近居民同業主都擔心，如果工廈改建成陰宅，佢哋夜晚經過會有心理壓力，另外空氣污染、噪音及治安都會惡化，交通更加擠塞，附近樓價一定插水，居民有乜法子唔反對呀。

叮！唔講真係唔知，非法骨灰龕場其實一早已經入侵工業大廈。管制私營骨灰龕場嘅立法遲遲未展開，有奸商利用立法前嘅真空期，違規將工廈改建。有啲奸商仲諗盡各種方法霸佔官地、農地搵快錢，好似風光如畫嘅大嶼山鹿湖本來係佛門重地，但就出現咗唔少無牌骨灰龕場，搞到烏煙瘴氣，真係佛都有火。最終受害嘅仲係死者家屬，佢哋花咗唔少錢買咗「僭建陰宅」，最終可能被迫遷，錢蝕咗不特止，仲令先人骨灰無安身之地，你話慘唔慘吖？

仲有，你喺清明時節去紅磡睇吓，會發現好多孝子賢孫喺街邊燒香拜祖先，事關佢哋嘅先人骨灰無法「上樓」，惟有入住「臨屋」。紅磡老龍坑街同必嘉街一帶有好多長生店，成為骨灰庇護中心，每到祭祖高峰期，孝子賢孫就會將骨灰請出嚟喺路邊拜祭，拜完再送番入去。如果先人在天有靈，知道自己身後仲要流離失所，又點會瞑目吖？

新一份施政報告用咗好多篇幅講住房問題，仲推出「置安心」大計，雖然只得五千個單位咁大把，但點講都聊勝於無，唔知政府幾時至可以將十八區建造骨灰龕場大計變成現實，令往生嘅港人可以置安心呢？叮！