政情：搞搞政：避談漏報利益發叔齋講風雨

行政會議成員、立法會議員兼鄉議局主席劉皇發被踢爆漏報公司嘅樓宇買賣交易後，旗下公司租出嘅農地近日又被揭發涉嫌違反土地用途同佔用官地，公眾疑慮未見減少，發叔尋日出席一個活動時卻拒絕回應事件，自顧自談風論雨。

尋日鄉議局舉行執委會會議，發叔可能預咗大批記者會繼續追問佢漏報利益件事，抵達鄉議局後，佢一個箭步就行咗入辦公室，令記者埋唔到身，直到開會前，佢先行返去會議廳。大家抓緊時間追問漏報利益件事，發叔連番耍手擰頭，只得一句「冇嘢講」！

開完會後，發叔慢慢離開會議廳，呢個時候佢唔知係心理好轉，定係有感而發，竟然笑騎騎話：「寒露風，霜降雨，呢個月份梗有風有雨啦！」十月係初秋，寒雖然談不上，風雨就不時有，發叔忽然講天氣，到底係借天氣講自己利益申報嘅風波，定係講即將來到嘅鮎魚，真係佢至知喇！