政情：吳斌最叻街頭吹水

冇耐前離開個人資料私隱專員公署嘅前專員吳斌，依家生活優游，日前見佢同朋友喺中環街頭行過，步履未見匆忙，同行色匆匆嘅路人好唔同，撞到熟人更即刻喺街頭吹陣水添，睇嚟佢好享受呢種生活噃。

個人資料私隱專員公署近排放生八達通，畀市民鬧到飛起，署中人頭都大埋，已經卸低私隱工作嘅吳斌就好梳乎，日前下晝三點幾，我哋見到佢同牙醫學會前會長陳建強喺中環置地廣場行街，佢哋邊行邊密斟，轉個頭，又撞到律師會會長王桂壎，吳斌曾經做過前任律師會會長，梗係停低同王桂壎吹吓水。

中環人大都行色匆匆，吳斌就優游好多，問佢離開公署後打算去邊度歎世界，佢話仲有好多嘢做，冇打算去旅行喎。

吳斌（左）喺街頭撞到王桂壎（右），又停低吹吓水。