港鐵版圖愈嚟愈大，日前屯門田景路近田景站建築署地盤內嘅重型吊機吊臂砸落輕鐵列車，都見港鐵高層奔走善後。主席錢果豐尋日講起件事都暗地抹一把汗，話乘客輕傷係「不幸中之大幸」！又係嘅，做運輸行業嘅人最希望出入平安，輕鐵今次有驚無險，睇怕錢果豐係最開心嘅一個。
錢果豐尋日去香港會食午飯，被問到呢宗十米長吊臂砸爛一架輕鐵列車、又扯斷八百米電纜嘅事，佢心情輕鬆咁話：「好彩重型吊臂有地盤圍板同工字鐵擱住，乘客大都輕傷，真係不幸中之大幸！」記得年前台灣都有類似事故，吊臂折斷砸中旅遊巴，造成有人死亡事件，今次嘅吊臂更重更巨型，事後輕鐵車頂只係部分凹陷，真係好好彩。
雖然有運氣搭夠，但錢果豐都話，今次意外反映地盤嘅重型機械操作水平必須提高。呢啲重型機器經常喺市區同人煙稠密嘅區域運作，一旦倒塌或者翻側，後果不堪設想。