九龍塘喇沙書院係傳統名校，尋日該校首位新西蘭籍校長舉行就職禮，前律師會會長黃嘉純係該校校董，都有去撐場。唔講唔知，黃嘉純原來係喇沙仔，喺度讀咗十三年書，難怪家吓都肯幫母校做嘢啦。
身兼港台顧問委員會主席嘅黃嘉純，七七年畢業於喇沙，佢由小一到中七都喺喇沙度過，做咗十三年喇沙仔。佢話以前喇沙校風相當自由，就好似屋企一樣，放學後佢經常留校踢波或者打網球，但設施同依家差得遠喇，佢記得以前嘅操場係「大沙漠」，一起腳就飛沙走石，塵土飛揚，點都比唔上依家嘅人造草皮足球場咁靚喎。佢曾經係網球校隊成員，但就唔記得有冇攞過獎：「唔記得喇，你問我實話有㗎啦！」
一九三二年創校嘅喇沙書院，因前校長王仁傑退休，新校長賀敬修士（Brother Steve Hogan）遠道從新西蘭喇沙書院調任香港，成為第十一任校長，典禮期間仲依喇沙傳統上台獻唱。