雖然政府轄下大部分諮詢組織嘅女性成員逐年增加，但比例都唔夠三成，各黨紛鬧爆政府無視女性，當中鬧得最大聲嘅白鴿黨，尋日就正式宣布成立性別平等督導小組，打算由內到外、上到下推動女性參政。
小組由白鴿黨副主席劉慧卿、終極普選聯盟副召集人黃碧雲同屯門區議員陳樹英擔大旗，佢哋發現黨內女性出任中常委、議員職務嘅比例得大約一成，完全唔合格，比率仲低過政府嘅諮詢架構，所以打算呢兩年鞭策白鴿黨追上國際嘅三成標準喎！
依家白鴿黨有七百幾個會員，但只係得唔夠四分一係女人，所以卿姐就度咗個獎勵計劃，每季招募得最多女性會員入會嘅地區支部，可以得到五千蚊嘅津貼，全年冠軍仲可以額外拎多三千蚊添！卿姐話呢個計劃喺新界東試驗過，當時佢拎咗一千蚊出嚟做獎金，最後成功吸咗十五個女黨員入黨，反應相當唔錯。
卿姐仲希望下屆立法會選舉，每區搵一個女候選人出選，最終目標係推三個女黨員入局，等佢喺議會唔使咁孤單。咁黃碧雲同陳樹英係咪佢嘅心水呢？卿姐話選舉從來都唔係欽點就成事嘅事，黃碧雲就透露黨內有好多人都想佢出選，但依家佢仲未下決定喎！