爆出惡導遊「阿珍」事件後,旅遊業議會不斷被外界猛轟監管不力,旅議會主席胡兆英當然好唔得閒。點知一波未平,一波又起,依家就連運輸界都唔放過佢哋。吓!關運輸界乜嘢事?唔通同旅遊巴司機有關?
的士小巴權益關注大聯盟主席黎銘洪不滿旅議會濫權兼自己友管自己友,尋日寄咗封信畀立法會,要求政府撤回旅議會嘅一切權力喎!佢話的士小巴業界同旅遊業絕對唔係冇關係,事關佢哋每日都載唔少內地客呢度去嗰度去。不過佢就話,佢咁唔滿意旅議會,都係因為佢一位親戚嘅遭遇。
佢話有位親戚喺一個商場擺檔賣香水,因有部分商品被海關懷疑係假貨而遭調查,點知旅議會喺海關未有判決前,即勒令所有轄下旅行社唔可以去嗰個商場購物,變相「誅九族」,令其他無辜嘅商戶都遭殃。佢好嬲旅議會自認「法官」,仲話:「海關都未判,佢憑乜嘢咁做?期間嘅損失邊個負責?」
黎銘洪又話立法會旅遊界議員謝偉俊收到佢封信已即時覆咗佢,睇嚟一直同旅議會過唔去嘅謝偉俊又有多啲子彈去射旅議會,睇嚟胡兆英要着定避彈衣喇!