事實上，自五區補選一役後，公文袋號召力已大不如前，有唔少中產同專業嘅傳統支持者紛紛求去，呢班人係公文袋嘅「水喉」，依家財源支柱動搖，揼人心口籌錢更加難上加難。

根據選舉法，立法會選舉候選人攞到百分之五或以上選票，每張選票獲津貼十一蚊，最多唔超過選舉總開支一半。以該黨陳淑莊得票十萬零三千幾票計，佢可獲發回七十萬元，呢筆數在情在理都應該歸還公文袋，但政府官僚機器運作需時，筆錢唔知幾時到手，遠水不能救近火，公文袋玩公投玩出火，分分鐘牽連明年區議會選舉。

財政半天吊，公文袋嘅選舉策略亦搞到半天吊，進退維谷。好似參加一二年超級區議會議席咁，佢哋想落場競逐，但當日一齊策動五區補選嘅搭檔社民連高調宣布杯葛超級區議會，佔盡道德高地，公文袋難免被比下去，所以聽講公文袋高層好希望社民連能回心轉意，陪佢哋一齊選超級區議會。

明知結果，何必當初，唔知公文袋有冇後悔走上公投之路呢？