詠恩喺女拔就讀，考獲八優一良，知道自己考獲佳績後，都感到好意外，仲話爸爸間中都會抽空教佢喎！以詠恩獲得嘅佳績，肯定唔愁升唔到中六，而佢話父母都係醫生，對醫科有較多接觸，唔排除拔尖時會選中大醫科喎。

九優拔萃仔熱捧沈祖堯

由於尋日朝早要出席公開活動，沈祖堯唔能夠陪囡囡返學校攞成績單。佢笑言自己都覺得好緊張，尋晚亦已安慰囡囡，同佢講盡咗力就得嘞。

除咗囡囡諗住會跟住爸爸嘅專業路線去行之外，仲有一個會考生熱捧沈祖堯。邊個？咪係考獲九優嘅拔萃仔梁俊彥囉，原來佢係沈祖堯嘅「超級粉絲」，話好欣賞沈祖堯喺沙士期間帶領一隊醫生向市民交代疫情，仲直言係沈祖堯啟發佢想做醫生添！

佢又自爆由細到大都同沈祖堯住喺同一個屋苑，平時都會同佢打招呼，仲試過同詠恩一齊學琴，但就笑言：「都唔知佢認唔認得我啦！」