巴西治安唔好已經街知巷聞，Jeffrey亦話巴西嘅貧富懸殊相當嚴重，雖然治安未至於強搶財物嘅地步，但人生路不熟，出入都要小心為上，唔好戴貴重嘢喺身，避免珠光寶氣令賊人垂涎，所以佢去好多地方都係着恤衫或T恤，兼且着鞋唔着襪，連平時戴開嘅勞力士腕錶都唔敢戴出街。不過，佢話酒店、旅遊景點都有保安同警察駐守，所以安全問題不大。

Jeffrey同朋友去餐廳品嘗正宗巴西燒烤時發生咗件趣事，事緣大家進入餐廳坐咗好耐，都冇侍應騷佢哋，後來詢問侍應先知原來每人枱頭都有一張薄卡紙，一邊紅色，一邊綠色，紅色代表「No Thanks！」，即係暫時毋須服務，咁啱大家張卡都係紅色向上，所以侍應咪唔敢上前打擾佢哋囉！