年輕人總愛撇甩父母四圍蒲，最近剛從美國返港放暑假的榮欣，偏偏最愛「孖住」媽咪周圍去，錫媽咪錫到燶。她更想為媽咪找個伴，不過定出的條件非常高，說只有美國型佬佐治古尼，才襯得起她心目中十全十美的媽咪。
葉榮欣在美國賓夕凡尼亞大學修讀哲學政治及經濟，暑假後便升上三年級。原本她選修的是數碼傳播，去年才轉系。
榮欣是大學學生會代表，回港後也沒閒着，為了幫同學慳錢，她日夜埋首編寫買賣二手教科書的電腦程式，做到半夜四點也沒怨言，搏殺性格似足母親。她又曾為大學附近的貧民中學做義務補習老師，學習母親回饋社會。
事實上，她參選學生會也是受到母親影響。「○八年立法會選舉，同媽咪一齊落區，佢同啲唔識嘅街坊都好好傾，我覺得佢好叻。我性格比較怕醜，但係見到媽咪都做到，我又試吓囉，日日喺校園叫同學簽名支持我，都幾困難㗎，結果都畀我選到！」她笑道。
寂寞童年 自己玩煮飯仔
榮欣最愛伴着母親四圍去，日前才現身書展，為葉劉的簽名會撐場。葉劉也很着緊女兒外形，「佢成日拉我去做運動，又會幫我買衫，不過我都係鍾意喺美國買衫多啲。」她調皮道。
其實榮欣的童年很寂寞。父親葉文浩在她八歲時肝癌病逝，母親當時任入境處處長，忙得不可開交，她放學回家只能和自己玩煮飯仔。直到○三年母親辭任保安局局長，一起到美國讀書，母女關係才大躍進。
不說不知，原來葉劉喜歡為人拉紅線，在匯賢智庫已成功撮合兩對有情人。問榮欣想不想母親也「搵個伴」，鬼馬的她興奮道：「都好喎，不過一定要高大、有學識、樣要有番咁上下、唔要光頭，最好比媽咪後生少少，仲要對我同媽咪都好！」她想一想道：「諗嚟諗去，都係佐治古尼George Clooney最啱，哈哈！」還未拍拖的她，對男朋友的要求則簡單得多：「啱傾開朗就得啦，鬼仔我都接受㗎。」
葉榮欣Profile
年齡：20歲
學歷：美國賓夕凡尼亞大學哲學政治及經濟系二年級
興趣：調酒、烹飪、編寫電腦程式
最愛的人：母親葉劉淑儀