表面上，政府唔係冇做嘢，社署網頁所列嘅長者社區支援項目有十七項咁多，另外全港有一百五十幾間長者地區中心或者長者鄰舍中心，提供外展式服務。而接連發生長者猝死事件後，社署仲承諾會針對性加強對隱蔽長者嘅支援服務添。

講就好聽喇，可惜呢啲服務多數到喉唔到肺，根本得個講字。無他嘅，當局口爽荷包立，資源唔夠，點可能真正照顧到隱蔽長者吖。好似荃灣梨木樹邨咁，話就話有社區服務中心，但成個中心只有一個外展社工，你話點樣提供服務吖？正如有長者話齋，「幾個月冇人探我，又冇人理我」。

當局口口聲聲要加強長者服務，其實全部係大隻講，相反，長者服務一年不如一年就真。呢，房屋署回歸前有一個支援網絡，專責協助公屋年長住戶，回歸後轉畀社署負責，點知社署一味縮皮，網絡人手大減，家陣已形同虛設。

更搞笑嘅係，房屋署各屋邨辦事處備有一份獨居長者名單，供職員上門家訪，但如果靠呢份錯漏百出嘅名單嚟照顧長者就大件事嘞。先排有個住屋邨嘅獨居長者申請免費家居維修服務，社署居然話呢位長者有仔女同住。唉，連長者係咪獨居都矇查查，又點樣提供針對性服務呀？

住喺公屋嘅長者尚且如此不堪，住喺私人樓宇嘅獨居長者就更加悲慘。正如有關注長者權益團體話齋，社署只係集中喺屋邨洗樓探訪長者，好多住私樓嘅長者根本冇人理。有啲患長期病嘅隱蔽長者，本應由有護理專業資格嘅人照顧，但係當局求其派個義工去送吓飯，陪佢哋覆診一兩次就算數。叮，呢啲表面工夫，做唔做都罷啦。

社署烏sir sir，連現時全港有幾多隱蔽長者都搞唔清，只係話正向七千人提供支援。其實去年一項調查發現，全港現時有六至八萬隱蔽長者，即係話，仲有九成隱蔽長者完全得唔到政府嘅照顧，你話淒唔淒涼吖！

隱蔽長者自生自滅，唔止死咗冇人知，一旦絕望，甚至會自殺，或者傷害他人添。所以話，幾萬個隱蔽長者等於幾萬個計時炸彈，如果政府仲係闊佬懶理，後果不堪設想。叮！