本文重點
立法會新大樓嘅建築工程正在進行，秘書處早前已經接觸唔同政黨、議員，仲發咗新大樓議員辦公室嘅編配指引，規定每層樓容納十五位議員，但啲議員組合名單就遲遲冇共識，尤其政改方案導致泛民大分裂，社民連同白鴿黨關係惡化，泛民散件又互相有心病。不過，講到厭惡指數，就數社民連三子最高，事關佢哋辦事處曾被指有人違例煲煙，所以冇人肯黐埋去。
辦事處被指有人煲煙
秘書處本來規定議員可以自由組合名單，多人嘅組別可以優先揀位，如果一樣人數就抽籤決定，不過各大小政團到家吓都未完全有共識。多次公開互插嘅白鴿黨同社民連無意做同層鄰居，費事成日行出行入面左左。最後白鴿黨揀咗同有五名議員嘅公文袋喺埋一層，另加一至兩名建制派議員為鄰。
社民連三子嘅處境就更加惡劣，有議員擔心佢哋成日邀請埋啲唔知咩人上辦事處，加埋煲煙嘅傳聞，唔少人都耍手擰頭。聽聞秘書處建議搵啲政治色彩冇咁濃厚嘅建制派政團同社民連一層，社民連話好過同白鴿黨啲人面左左，但建制派肯唔肯都係未知之數。
長毛雖然一再否認佢曾經喺辦事處食煙，但啲煙味又係點樣嚟呢？係咪社民連嘅訪客食有待查證，不過，呢啲事已經令到人哋驚咗佢哋，睇嚟三子想搵鄰居真係唔容易。