暑假已到,好多香港留學生都乳燕歸巢,職工盟立法會議員李卓人個9A狀元乖女李適之(Justina)去咗美國讀大學,呢個暑假特登返香港實習。早排阿人為最低工資立法通頂開會三十小時,事後有fans送上一個花籃打氣,之後嚟立法會幫阿人搬花籃嘅,竟然係佢千金。
Justina中學讀瑪利諾修院學校,○八年會考做咗9A女狀元後,原本諗過「拔尖」報讀中大新聞與傳播學課程,但最後都係決定改去美國紐約大學修讀傳理系,開吓自己嘅眼界。Justina去到學習環境與香港好唔同嘅美國,成績依然出類拔萃,首年GPA攞到4.0,即相等於九十一至一百分嘅A級,證實佢唔係只識死讀書嗰種高分低能學生。
阿人話囡囡讀書咁叻,已經係對佢嘅最大回報,唔會好似有啲家長咁逼囡囡讀啲搵到多啲錢嘅科目,最緊要係佢自己鍾意。