最終立法會主席見局長不眠不休咁實條條例，曾經邀請佢出席喺立法會宴會廳慰勞秘書處職員嘅午宴，食番餐好嘅，但張建宗卻婉拒，話睇住法例通過係政策大移動，唔想錯失聽取議員發言，結果主席見局長咁堅持，決定破天荒休會二十分鐘，畀局長食番個快餐，包括議員請秘書處食嘅乳豬同燒肉，充充電再應付通宵會議。

雖然冇米落肚，但都唔會餓親張局長嘅，事關佢都食過一兩次三文治，都頂得吓肚㗎！總好過有啲退咗休返內地養老嘅公公婆婆，因為時限問題攞唔到生果金，搞到冇得食吖！睇怕張建宗就係要急佢哋所急，快手啲為佢哋解決困境。

話說今次成功就最低工資立法，十年前時薪只有七蚊嘅清潔工嚴伯係歷史功臣，張建宗話佢喺同一個歷史時空中都有出現，佢話○三年時佢係經濟發展及勞工局常秘，有份搞外判工要有最低工資保障。今次立法，唔知嚴伯開心啲，定係張建宗安慰啲呢？