其實，泛民各黨派好主要係喺逢周五召開嘅「飯盒會」嚟尋求對政策嘅共識，公社兩黨尋日仲口口聲聲話需要重整飯盒會。公文袋黨魁余若薇直言過去一年泛民議員喺飯盒會之間嘅合作唔算暢順，希望出年會有所進步，佢仲唔點名批評有個別議員經常遲到，希望泛民盟友唔好喺《基本法》第二十三條同政改等重大議程先肯合作，應該主動派人出席會議，避免各自為政喎！

一直咬住白鴿黨唔放嘅社民連，主席陶君行就直指泛民召開飯盒會係為咗結集本港嘅民主派力量，為市民爭取權益，向政府討價還價，但飯盒會嘅意義經政改一役已漸漸褪色。跟住佢又狠斥白鴿黨今次喺政改問題上，選擇同中央談判前冇喺飯盒會上公開交代，將其他泛民議員蒙在鼓裏。

同時，佢又希望加強飯盒會嘅約束性，令任何人士以泛民之名行事前，都必須得到大部分盟友支持。

陶君行驚白鴿黨洩密

陶君行仲話除非白鴿黨保證唔會再同中央進行任何「密室政治」，否則難洗該黨會「出賣盟友」之嫌，佢又話：「好似我哋喺會上提供資料畀你同阿爺交易，我話晒畀你知社民連會做乜，你就將佢和盤托出，咁係會有唔公道嘅地方。」

泛民內部其實早就四分五裂，各懷鬼胎，只顧本身嘅政治利益。嘩！社民連啱啱先話要修補合作關係，轉個背就大鬧白鴿黨唔可靠，只係喺度撩交嗌兼自相殘殺啫！

再講，以前泛民開完飯盒會之後，好多嘢都冇一致立場，遠嘅唔講，淨係講番最低工資條例草案，咪一樣係咁，陶君行依家仲向白鴿黨開條件要保證唔會洩密，白鴿黨主席鐵頭仁早前一再強調同中央冇枱低交易，仲會繼續同中央就政改溝通，畀泛民政黨當做內奸咁，試問又點再合作吖！