香港貿易發展局前總裁施祖祥，退休後過着低調生活，間唔中蒲頭都係為咗撐愛女Karen施敏珊。尋日佢又同囡囡齊齊出現喺專收自閉兒童嘅幼兒園—陳蔭川學兒樂園嘅簡介活動，父女行善一條心。
施祖祥笑謂，Karen係臨床心理專家，喺鄰舍輔導會旗下嘅自閉症專門店擔任義務顧問，今次蒲頭都係因為支持囡囡。雖然佢經常出席鄰舍輔導會嘅活動，但強調冇任何頭銜，純粹係義工性質，佢好享受退休生活㗎！
舊年施祖祥曾親力親為幫手籌款，曾經係高官嘅身份實令佢事半功倍喇！不過佢話好似冇咩優勢噃！自己做籌款工作時，都唔係幾運用到以前嘅人際網絡，唯一好處係同傳媒關係唔錯，可以幫手做推廣。佢又乘機為自閉症兒童發聲，批評社會資源投入不足，大家應該畀多啲關注喎！