港大地理學系講座教授詹志勇用事實證明，呢棵榕樹的而且確係百年古樹。佢搵到一張一九一○年代喺同一地點影嘅相片，上面已有呢棵細葉榕，保守估計，當時至少有十至二十歲。咁即係話，棵樹家陣已超過一百歲，有足夠資格列入古樹名木冊，受政府特別照顧。

康文署樹隊有成幾百人咁多，當中好多仲係浸過鹹水嘅專家，點解會走漏眼呀？再講，核實樹齡唔係咁難啫，學詹志勇話齋，可以透過歷史圖片或者口述歷史，從中核對樹木位置及種植年份推斷樹齡。可惜呢班所謂專家徒有虛名，水皮不特止，做嘢仲得過且過，出錯好似食生菜。

遠嘅唔講，就講早前沙田圓洲角冧樹殺人嗰單畸士，康文署樹隊事發前一個月先至檢查過，話冇問題，點知轉個頭就出事。政府總部呢棵榕樹亦一樣，其實根部一早就開始腐爛，但係康文署早排巡查時仲話冇事。靠呢班有眼無珠嘅人去普查古樹名木，又點會唔錯漏百出呀？

更搞笑嘅係，康文署衰咗唔肯認，實牙實齒話根據署方嘅資料，未可以確定呢棵樹超過一百歲，又唔符合珍貴樹種、樹形出眾等其他條件，所以冇列入古樹名木冊。

事實上，呢本被當局吹到天上有地下無嘅古樹名木冊，原來不知幾兒戲，好多內容都不盡不實，應該列入嘅樹木冇列入，唔應該列入嘅反而榜上有名。呢，早前有立法會議員踢爆，鯉魚門度假村有棵朴樹喺○四年已經斬咗，而且又唔係古樹，但當局仲係將呢棵死樹嘅「遺照」刊登喺古樹名木冊上面，你話係咪笑甩人哋棚牙？

叮！靠呢本古樹名木冊嚟開展古樹名木保養就死得樹多咯。所以詹志勇直言，中環同尖沙咀百多年前廣種樹木，隨時有漏網之魚。佢促請當局巡樹時千祈唔好咁求其，對老樹尤其要「睇得清楚啲」。詹教授話，康文署今次走漏眼係因為大意。其實，講得直接啲，就係玩忽職守。康文署咁搞法，等同公立醫院嘅庸醫忽視需要特別照顧嘅長者，唔出事至奇。

有學者講得啱，呢啲古樹經歷咗人類四代人，見證咗香港百年滄桑，好珍貴，好難得，康文署「草菅樹命」，搞到樹毀人亡，實在係千古罪人。叮佢個鎯鎯！