依家年輕人有自己嘅一大套睇法，正如立法會議員甘乃威嘅囡囡喺中西區一間女校就讀，年紀輕輕就已經好獨立，自己走去申請交流生計劃，結果獲派入住奧地利維也納一個義工家庭，暑假出發，一年後先返港。
唔識德文急報班
甘威尋日話，由於囡囡獲義工家庭提供食宿，只須負擔一年一萬蚊美金嘅學費，折算港紙大約八萬蚊，算係超值，咁啱囡囡又鍾意古典音樂，平日愛吹色士風，而維也納又係古典音樂之都，囡囡可以去當地留學，梗係開心啦。唯一問題係，囡囡一句德文都唔識，所以拿拿臨報讀咗個九個禮拜嘅德文課程，學番幾句日常用語傍身先至起程。
出國留學，不失為擴闊視野嘅一個好方法，但係為人父母嘅，要同愛女離別，始終會掛心。甘威話，冇法啦，交流生計劃嘅主辦機構開到口，唔建議父母探子女，畀空間學生學習自己獨立生活，所以甘威同太太已有默契，一年內都唔會去奧地利探女。