世界盃終於曲終人散，最後由西班牙險勝荷蘭首次捧盃。雖然荷蘭始終擺脫唔到「二奶命」，但荷蘭駐港總領事舒鎮邦（Robert Schuddeboom）睇完賽事後絕冇心情低落，仲決定喺官邸大宴親朋，請嚟各國領事同喺香港居住嘅同鄉齊齊「一醉解千愁」。不過，最搞笑嘅係，西班牙駐港總領事霍尼雷斯（Juan Luis Flores）竟然唔怕面對一眾啱啱輸波嘅熱血荷蘭人，膽敢深入虎穴贈興，搞到全場情緒鬼咁高漲！
舒鎮邦已經做咗總領事兩年，佢話好鍾意香港呢個咁特別嘅城市，仲話香港人同荷蘭人其實好似，事關大家都係咁鍾意批判政府喎。講番場波，佢就話荷蘭隊今屆其實踢得唔錯，本身都好有冠軍相，只係西班牙比佢哋勁少少咁多啫。佢仲講笑咁話，好想將嗰隻估中咗西班牙會贏嘅八爪魚保羅切開嚟做壽司，勢要食咗佢洩憤，認真搞笑！
西班牙總領事霍尼雷斯以勝利者姿態到場時，旋即成為全場焦點，舒鎮邦仲立即向佢下戰書，揚言兩年後荷蘭一定會喺歐洲國家盃打低西班牙報仇。霍尼雷斯就打圓場，話今次雖然西班牙揮低咗荷蘭，但今屆世盃三強都係歐洲嘅天下，已經好值得大家驕傲喎。兩人最後仲歷史性咁將代表自己國家顏色嘅呔交換嚟戴，實行以和為貴！