梁美芬尋日喺茶敍時自爆當年返大陸讀中國法律時，畀啲同輩笑到面黃，話內地嘅發展同法治水平咁差，讀嚟都唔知有乜用，但隨住內地經濟起飛，法治水平提高，依家啲香港人以至外國人都排晒隊攻讀中國法律。

又例如佢身為大學法律教授，走咗去選九龍城區議員，亦試過畀人笑佢cheap，但事實證明有愈嚟愈多專業人士參選區議員；加上啱啱通過區議會政改方案，令唔少有心競逐五個「超級區會議席」嘅重型級政界人士，都要重新考慮參選區議員，再次證明佢走得前過人。

佢年前因瞓身關注鼠患，而畀人叫「鼠王芬」，多少有啲貶義，但最近香港接連發生鼠咬人醜聞，引起各黨派議員關注，相信佢都唔會再介意畀人叫做「鼠王芬」囉！