論形勢，本來復會後正係建制派重奪財會主席嘅好時機，事關政改一役，白鴿黨因撐政改而遭社民連追打，致兩黨割席，卿姐選財會，隨時走失社民連三票，形勢不利。不過，政治有時就係咁弔詭，建制派依家想扳倒卿姐嘅意欲，反而係歷年最低。

有建制派議員表示，以前建制派要喺卿姐手中搶回財會主席職位，多多少少係代西環同中環出手，但今次政改方案獲白鴿黨力撐下得以通過，卿姐發揮咗一定影響力，論功行賞，冇理由再留難佢，更何況「623」政改方案表決，卿姐走向建制派支持者面前揮手，獲拍掌歡呼回應，佢亦因而多咗個花名叫「揮手卿」，呢場罕見嘅和諧情景，隨時令西環同中環打消阻攔卿姐執掌財會嘅念頭。

此外，建制派要扳倒卿姐，技術上亦有難度。過往中總代表黃宜弘同建仔嘅陳鑑林都試過同卿姐對撼，可惜兩人同建制派有牙齒印，由於走票而鎩羽而歸，再加上喺難覓合適人選嘅情況下，建制派上年已冇搵人挑戰卿姐，依家政改新形勢下，就更無謂勉強出戰啦。

若然無風無浪冧莊財會主席，卿姐固然飲得杯落，但喺政改一役後，呢個新定位對佢喺二○一二年選情係好事定壞事，就好難講囉。