正副主席同唐唐會面

富貴黨主席Miriam劉健儀尋日聯同兩名副主席方剛、張宇人，一齊見政務司司長唐唐。Miriam喺會後話，佢哋對本地立法問題已有初步意見，譬如五個新嘅區議會功能界別議席，最好以全港為一大選區，用比例代表制選出，參選人資格係現任或前任民選區議員，條件要攞到十個民選區議員提名。至於下屆特首選舉委員會就最好擴大界別範疇，將一啲喺立法會內冇功能界別議席嘅，例如地產代理、印刷業或中小企等納入其中。

對於之前有政黨提過，直選議席增至六十五個後，可能要喺依家新界東同新界西選區中，劃出新界中或者叫做新界北嘅選區，Miriam斷然拒絕，話佢都諗唔到應該點劃出新選區好，即使只係為選區重新劃界亦冇諗過。跟住佢又話富貴黨初步建議下屆立法會增加嘅五個直選議席，最好簡單咁五區各加一席就算，毋須劃出新選區或者重新劃界。

新東新西盼各加一席

既然議席加多咗，個餅都大咗，點解仍然要切番五塊？切多啲，分散投資唔好咩？其實箇中有玄機㗎，好可能同富貴黨能唔能夠喺下屆重奪直選議席有關。

大家都知道上屆立法會，富貴黨喺新東同新西各有一席，可惜○八年選舉中未能攞夠票而黯然離開。若果條數係咁計嘅話，即係今次兩區能各加一席，喺比例代表制下，富貴黨就有機會東山再起，相反劃出新選區就會令本來已經掹車邊嘅佢哋更加機會渺茫，而重新劃界亦會影響佢哋嘅選舉部署，切多塊餅條數可能會蝕底添！咁Miriam梗係希望以不變應萬變啦！