雖然貿發局搶佔道德高地，講到義正詞嚴咁，但係聽到佢哋嘅理由，啲o靚模經理人同書商就火冒三丈，決定就簽名會申請提出上訴。有出版社負責人話：「只要大會定出高尚同低俗嘅界線，我哋一定會盡量遵守，問題係貿發局從來無畀明確指引！」其實，何謂意識不良，從來都係見仁見智，就以o靚模現象本身嚟講，有人認為意識不良，教壞細路，有人認為係順應市場潮流，無傷大雅。

喺咁嘅情況下，如果當局真係可以明察秋毫，禁止越軌行為，捍衞書展健康風氣，本來都無可厚非嘅。之不過，講到佢哋嘅判斷能力，太一叮實在不敢恭維，最經典係○七年書展，有書商擺賣一本刊登多幅歷史名畫同雕塑嘅《愛情神話》，竟然畀影視處當做色情物品，一度勒令書商收起。由此可見，好多官員都係不學無術嘅盲毛，連色情同藝術都分唔清，今次「整頓書展形象」，會唔會又係殺錯良民，弄巧反拙？

講到呢度，大家不妨回顧一吓舊年書展，反o靚模團體都話，反o靚模行動唔係針對o靚模，而係擔心佢哋嘅宣傳活動惹來追星一族，造成混亂，滋擾書迷，認為貿發局應該為寫真集同相關活動另設獨立區，分開銷售，達致雙贏局面。簡而言之，o靚模本無罪，錯在貿發局，只要主辦單位安排得好，好多問題都係可以避免嘅。

睇番事實，確實係咁，唔好話o靚模活動安排欠佳，大家淨係睇吓舊年書展嘅三樓台灣展區，雖然吸引咗歷來最多書商參展，可惜，因為貿發局宣傳唔夠，入場人數得嗰小貓三四隻，有參展商埋怨生意額只得前年一半，「十五年嚟搞得最差係今年！」主辦單位冷待台灣書商，唔佗衰家都算執到啦，仲講乜嘢「書展形象」啊，叮！

一句講晒，唔怕o靚模出位，最怕盲毛添亂。捍衞書展形象嘅最大關鍵，就係主辦單位做好自己份工，妥善安排，管好秩序，如果唔係，隨時搞到o靚模、書商、市民怨聲齊起，提倡閱讀嘅書展變成盲毛官添煩添亂嘅「輸展」，咁就好笑啦，叮！